Mjøsa runt med mor

Ei annleis klassereise. Dette er ei forteljing om ei mor og ein son på biltur rundt Mjøsa. Sonen Bjørn Hatterud er fødd med ei rekkje funksjonshemmingar, har vore eit overvektig mobbeoffer og er homofil og klassereisande. Han flytta frå heimbygda, Veldre nord for Brumunddal, då han var 21 år gammal, og har budd halve livet i Oslo. Som tenåring drøymde han seg vekk. På ein trimma moped tok han sine første turar bort frå heimbygda, inn i fridommen. I dag drøymer han seg tilbake mens han køyrer heim til bygda i bil. Boka fortel ei sjølvbiografisk og personleg historie om å ikkje passe inn der ein kjem frå, og om samstundes å ikkje kunne slå seg heilt til ro i byen heller. I tankar og samtaler går reisa mellom fortida og notida, mellom bygda og byen, mellom ulike lag av minne frå livet til ein funksjonshemma, homofil bygdegut frå arbeidarkår som har arbeidd seg inn i kunst- og kulturfeltet i hovudstaden. Mest av alt er dette ei forteljing om korleis barndomslandskapet set seg i sjela, og om korleis ein aldri heilt kjem seg bort frå plassen ein voks opp. Boka er ein hyllest til ein oppvekst, ein generasjon, eit geografisk område og ikkje minst til ei mor.